إف سان لوران .. وهل يخفى القمر !
أنتجت أول عطر لها (Y) عام 1964 م .. وإلى هـ السنة وإنتاجهم -بعمومه- رائع ومتميز ..
عطورهم مميزة ومشهورة عالمياً .. وكل فترة يطلعون بعطر يكسر السوق .. مثلهم مثل الشركات الكبيرة .. ديور وشانيل وقوتشي وغيرهم ..
ما أدري من وين أبدا .. عطورهم راقية وحلوة كل اللي جربتها .. الا واحد
طيب .. بابدا من أول عطر شريته وانهبلت عليه .. الرائع M7
ام7 عطر رجالي-شرقي .. حلو وكلاسيك ..
يصلح هدية رجالية .. لأن الرجال غالباً يمشي معاهم هـ العطر .. شرقي وريحته على عود .. وهذي تقريباً الريحة الكلاسيك بالنسبة للخليج تقريباً ..
أنصح أيضاً تتعطر منه إذا بتحط دهن عود أو تتبخر .. لأنه يمشي معها ويعطيك جو حلو ..
يصلح للمناسبات والسهرات .. وبرضو ممكن يكون عطر دوام ويومي ..
وإذا كنت جربت عطر وأعجبني لدرجة أسميه الأسطورة .. فـ ما يكون عطر عادي .. وبالتأكيد العطر الأسطورة عند اف سان لوران واللي للحين عاجبني وودي أشتريه مرات ومرات .. CINEMA
صراحة العطر أكبر من إني أوصفه .. فعلاً فعلاً أسطورة ..
العطر نسائي .. ناعم شوي .. وقوي .. بتعب وأنا أوصف ..
ممكن جداً يستخدم رجالي .. وهذا من مميزاته .. فعلاً إذا استخدمته تصير ريحتي مميزة ومن العطور اللي تثبت ومع الوقت تحلوّ ريحتها ..
غاااالب الحريم والبنات يستخدمونه .. مع إني أصنّفه عطر حريم كبار شوي .. يعني على الثلاثين .. لكن ممكن تستخدمه بنت العشرين إذا عندها مقابلة مثلاً .. رسمي وحلو ..
طلع منه شي فريش .. وطلعوا برضو أكثر من إنتاخ بخطّ الجسم بتاعه .. بدي لوشن ، مساج أويل ، شامبو ووو
أذكر أغلاها المساج أويل .. ناسي سعره بالضبط بس بحدود الـ600 .. وما تلقاه دائماً ..
جاز .. من أقدم وأروع عطور اف سان لوران .. رجالي فريش .. هذا الإصدار الأول منه .. وطلعوا كم إصدار من جاز كلها بروائح متقاربة ..
عائلة Opium
أوبيم عائلة عطور من إنتاج اف سان لوران .. الغريب إنها تختلف بين بعض .. فيه منها النسائي الناااعم .. وفيه الرجالي (اللي بالصورة) اللي صح ناعم شوي .. بس عطر قوي يعني .. استخدمته وأنصح فيه .. يصلح عطر صباحي ..
تبون أعلمكم العطر السخيف اللي ما أعجبني ! طيّب
ببداياتي بالعطور .. أول ما نزل هالعطر تقريباً .. شريته
اللي صار إني كنت أدور وشميت عطور واجد .. وخلاص صرت ما أميز .. أخذت ذا العطر وكان آخر عطر شميته .. توقعت إن ريحته متميزة .. وذاك الوقت ما كنت متعود على تكرار الروايح .. خشمي خبّط يعني ..
أخذت العطر .. ويوم رجعت البيت ورجع خشمي لطبيعته زيطلع العطر ما أدري وش يبي ..
ما بخيت منه إلا شوي .. ثم أخذه أخوي يقول عاجبه .. وكرهت كل عائلة كورس واللي خلفهم ..
لكن هـ الشي ما منعني إني أشتري بعده بمده مو طويلة ..
العطر حلو .. ناعم نسائي طبعاً .. ممكن يصلح للسهرات اللي ما تصير زحمة .. يعني عزيمة خفيفة ..
برضو يصلح صباحي .. طلع منه تواليت (خفيف) بس ما جربته ..
البدي لوشن بتاعه كان عندي وجلس أكثر من العطر .. ريحته مميزة وضبط مع عطور كثير .. حتى اللي كانت مو على خطه .. يعني رجالية أو سبايسي .. يعطيها جو ..
تقريباً هذا آخر عطر رجالي نزلوه .. صراحة العطر حلو ويسوى ..
يصلح رسمي ويصلح حق سهرات .. من العطور الكلاسيك نوعاً ما ..
غطاه الكبير يميزه .. برضو كونه من العطور الرجالية اللي تنزلها اف سان لوران بالسنتين الأخيرة .. ما نزلوا رجالي الا قليل .. بينما النسائية كثير ..
واذا بنتكلم عن الأخير ما نقدر ننسى عطر من أفضل العطور اللي نزلت السنة الماضية .. elle
العطر جداً حلو ، نسائي .. يصلح سهرات بالدرجة الأولى .. ممكن يستخدم للمقابلات فيه رسمية شوي ..
الشي اللي استغربته إن العطر نزل مع خط الجسم مرة وحدة (البدي لوشن ، الشامبو) مع إنه بالعادة ينزل العطر وبعد فترة ينزل خط الجسم .. حركة تسويق .. لكن استغربت يوم شفت خط الجسم موجود مع العطر أول ما نزل ..
عموماً أنصح بالعطر هذا هدية .. ريحته حلوة جداً ومميزة .. وأتوقع أي وحدة ممكن تتقبله ..
وش باقي بعد .. وش باقي !
ايوه .. تذكرت
باريس ..
العطر هذا جتني منه عينة هدية من كومة هدايا مرة .. من دبنهامز
رميته بالدرج لين يجي وقت الحاجة .. وفعلاً مرة كنت مستعجل وفتحت الدرج ولقيته قدامي .. تعطرت منه على السريع ومشيت .. بعدين تحسفت .. لأن هـ العطر ما تستخدمه لأي مناسبة ..
العطر أولاً نسائي ناااعم جداً .. لطيف .. ما أحسّ إنه يصلح سهرات مثلاً أو طلعات .. أحسّ يناسب البيت .. للمتزوجات يعني .. مب عطر إثارة بقدر كونه عطر ناعم ويعطي ريلاكس عجيب .. من جد يعيشك جو ..
تقريباً هذا اللي أذكر من عطور اف سان لوران .. والا عطورهم أكثر من كذا .. ممكن نسيت عطر عطرين أنا استخدمتها .. غير العطور الكثير اللي ما استخدمتها .. بالعموم غالباً إذا شفت YSL اشتر ولا تشاور .. لأنه اسم قوي وقليل يطلعون شي عادي ..
.. ،
إذا قلنا (اف سان لوران) بنتكلم بأشياء كثير .. ملابس .. أحذية .. شنط .. وأشياء واجد ..
بمجالنا ممكن نقول من أقوى الشركات بالمكياج والعناية بالبشرة .. عيبهم إن منتجاتهم غالية جداً ..
مقارنة بغيرهم غالين .. لكن تستاهل سعرها .. كثير سمعتهم يمدحونها ..
كريم الأساس .. الروج .. الشادو .. كلها قوية ..
أيضاً كريمات العناية بالبشرة عندهم مميزة ..
أذكر قبل فترة طلعوا خطّ عناية كان جداً رائع .. من ضمنها كريم مرطب للوجه يقول البياع إنه صنّع عشان يخلي البشرة مثل بشرة البيبي .. طبعاً انا ما وفّرت أخذت لي عينة .. واستخدمتها -عشان أعطيكم إنطباع صحيح - وفعلاً لقيت شي مميز ..
عموماً الشركة جبّارة والاسم له وزنة بأشياء كثير ..
هذا اللي عندي
الإثنين مارس 03, 2008 5:04 pm
